Luke 10

Jesu kêsakiŋ lau 70 sêja

1Tonaŋ su, go Apômtau kêjaliŋ lau 70 sa sêwiŋ ma kêsakiŋ êsêac luagêc-luagêc gebe sêmuŋ sêna malac to gamêŋ, taŋ eŋ taê gêjam gebe êna naŋ. 2Ma kêsôm gêdêŋ êsêac gebe “Mo tau tec ŋanô kêsa samob, mago koleŋwaga tec luagêcgeŋ. Amboac tonaŋ ateŋ êndêŋ mo tau ŋatau gebe êkêŋ koleŋwaga nasênac nê gêŋ ŋanô sa. 3Alic acgom, aê jasakiŋ amac amboac domba asêp kêam sec ŋalêlôm ana. 4Akôc awa êsêp ômbiŋkap ŋaatali atom. Ambic atali atom. Asô atapa atom. Ma awem ênac lau aŋga intêna atom. 5Embe api andu teŋ, go asôm êtu ŋamatageŋ gebe ‘Biŋmalô êpi andu tonec.’ 6Ma biŋmalô latu teŋ embe êŋgôŋ tônê, go amacnêm naênsac eŋ. Ma embe masi, go êmu êndêŋ amac êwac êtiam. 7Aŋgôŋ andu tau tonaŋ ma aniŋ to anôm gêŋ, taŋ sêkêŋ êndêŋ amac naŋ, gebe koleŋwaganê ŋaôli gêjac eŋ ŋawae. Alom-alom andu atom. 8Ma embe naasa malac teŋ e sêkôc amac sa, go aniŋ gêŋ, taŋ êsêac sêkêŋ amac naŋ, 9ma aŋgôm lau gêmac, taŋ sêmoa malac tau naŋ, ôliŋ ŋajam êsa to asôm êndêŋ êsêac gebe ‘Anôtônê gamêŋ kêdabiŋ amacgac.’ 10Ma embe asa malac teŋ e sêkôc amac sa atom, go aêc mêŋako intêna ma asôm gebe 11‘Amacnêm malac ŋakekop, tec gi aêac eŋkaiŋ nec, aêac êndôŋ su wacêpi amac taôm. Mago biŋ tonec ajala gebe Anôtônê gamêŋ kêdabiŋ su.’ 12Aê jasôm êndêŋ amac gebe Êndêŋ bêc Anôtô êmêtôc biŋŋa lau Sodom oc sêŋgôŋ naeo êtôm lau malac tonaŋŋa atom.

Ojae kêpi malac, taŋ sêjam tauŋ ôkwi atom

(Mat 11:20-24)

13“Ojae Korasinma, ojae Betsaidama. gêŋtalô taŋ gagôm aŋga amacnêm naŋ, embe jaŋgôm aŋga Turu to Sidon nêŋ, oc sênam tauŋ ôkwi wanêcgeŋ ma sêsô talu to sêliŋ wao sa sêŋgôŋ. 14Êndêŋ bêc mêtôcŋa Anôtô taê walô lau Turu to Sidon êlêlêc amac su. 15Ma aôm Kapanaum tonaŋ, gobe sêsuŋ aôm sa e nadiŋgeŋ undambê me. Aôm oc u taôm e gacgeŋ ôsêp lamboam ôna.”

16Ma Jesu kêsôm gêdêŋ nê ŋacseŋomi gebe “Ŋac taŋ gêŋô amac naŋ, gêŋô aê, ma ŋac taŋ kêmasuc amac naŋ, kêmasuc aê. Ma ŋac taŋ kêmasuc aê naŋ, kêmasuc ŋac, taŋ kêsakiŋ aê gamêŋ naŋ.”

Lau 70 tonaŋ sêmu dêdêŋ Jesu sêja

17Lau 70 sêmu sêmêŋ kêtiam totêntac ŋajamgeŋ ma sêsôm gebe “Apômtau, ŋalau sec taŋeŋ wamu gêdêŋ aêac gêwiŋ kêtu aômnêm ŋaêŋa.” 18Ma Jesu kêsôm gêdêŋ êsêac gebe “Aê galic Sadaŋ tau gêu tau aŋga undambê amboac ôsic. 19Alicgac me, aê kakêŋ ŋaclai gelom amac gebe aka moac to alidêbu ma akôniŋ ŋacjo tau nê ŋactêkwa samob tôŋ, ma gêŋ teŋ oc êŋgôm amac atu sec atomanô. 20Tageŋ atu samuc êtu ŋalau sec taŋeŋ wamu amacŋa nec atom, atu samuc gebe teto amacnêm ŋaê gêc undambê.”

Jesu têtac ŋajam kêsa

(Mat 11:25-27; 13:16-17)

21Gêdêŋ ŋasawa tonaŋ Ŋalau Dabuŋ gêjam Jesu auc e têtac ŋajam kêsa ma kêsôm gebe “Tamoc, undambê to nom Ŋatau, aê jalambiŋ aôm gebe gôsaŋ biŋ tônê auc gêdêŋ laumêtê to lau tokauc ma goc lasê gêdêŋ ŋacpalê dedec. Aec, Tamoc, biŋŋanô, aôm gôlic ŋajam amboac tonaŋ, tec gôgôm nêm gêŋ.

22“Tamoc kêkêŋ gêŋ samob gêdêŋ aê. Ma ŋac teŋ kêjala Latu atom, Tama taugeŋ. Ma teŋ kêjala Tama atom, Latu taugeŋ to êsêac, taŋ Latu gebe eoc lasê êndêŋ êsêac naŋ.”

23Go kêsa tau ôkwi mêŋkêsôm gêdêŋ nê ŋacseŋomi tauŋgeŋ gebe “Aê aoc êôc mateŋanô, taŋ sêlic gêŋ ônaŋ amac alic naŋ, 24gebe aê jasôm êndêŋ amac gebe Propete to kiŋ gwalêkiŋ sebe sêlic gêŋ, tec amac alic nec, mago sêlic atom to sebe sêŋô biŋ, tec amac aŋô nec, mago sêŋô atom.”

Biŋgôlin ŋac Samaria taê walô ŋacgêbac

25Biŋsutau teŋ gêdi sa gebe ênsaê eŋ, tec kêsôm gebe “Mêtêmôkê, aê jaŋgôm asageŋ, ec jawê kaiŋ jaŋgôŋ matoc jali teŋgeŋ.” 26Jesu gêjô eŋ awa gebe “Teto biŋ ondoc gec Mosenê biŋsu. Aôm kôsam amboac ondoc.” 27Tec ŋac tau kêsôm gebe “Têmtac êwiŋ Apômtau, aômnêm Anôtô, tonêm ŋalêlôm samuc ma nêm katôm samuc ma nêm ŋaclai samuc ma nêm kauc samuc êwiŋ eŋgeŋ, ma têmtac êwiŋ lau wacbaŋ aôm amboac têmtac gêwiŋ taôm.” 28Ma Jesu kêsôm gêdêŋ eŋ gebe “Kôsôm jagêdêŋ. Ôŋgôm amboac tonaŋgeŋ, go ômoa matam jali teŋgeŋ.”

29Ŋac tonaŋ gebe êwaka tau sa, tec kêtu kênac Jesu gebe “Lau ondoc mêŋbaŋ aê.” 30Go Jesu gêjô eŋ awa gebe “Ŋac teŋ aŋga Jerusalem kêsêp Jeriko gêja e kêsêp kêjaŋgowaga ŋalêlôm. Êsêac sêkwalec ênê ŋakwê su ma sêjac eŋ gêwê siŋ sa ma sêc sêja. 31Gocgo ŋac dabuŋwaga teŋ gêjam kauc ŋac tonaŋ ŋabiŋ kêsêlêŋ kêsêp intêna tonaŋgeŋ gêja e gêlic ŋac tau gêc ma gêôc lêlêc eŋ gêja. 32Ma Lewi teŋ amboac tonaŋgeŋ. Mêŋgêô lasê gamêŋ tau e gêlic eŋ su ma gêôc lêlêc eŋ gêja. 33Go ŋac Samariaŋa teŋ kêsêlêŋ gêmoa e jagêô lasê gêdêŋ eŋ, tec gêlic e taê walô eŋ 34ŋa kêtu gasuc gêdêŋ eŋ jakêkêc niptêkwi to wain kêsêp ênê kamoc su, go kêsabaŋ ma gêôc eŋ sa gêŋgôŋ tau nê bôc ŋaô ma kejoŋ eŋ kêpi andu ŋacleŋŋa jagejob eŋ. 35Ŋabêbêc gê denari luagêc sa jakêkêŋ gêdêŋ andu ŋatau tonaŋ ma kêsôm gebe ‘Ojop eŋ ŋapep. Ma gêŋ, taŋ ôkêŋ êlêlêc ŋaôli tonaŋ su naŋ, embe jamu jamêŋ, go janac ŋatôp.’ 36Aôm gobe lau têlêac tonaŋ nêŋ asa kêtu ŋac, taŋ kêjaŋgowaga sêjac eŋ naŋ, nê ŋac jabaŋ eŋ.” 37Tec biŋsutau kêsôm gebe “Ŋac taŋ taê walô eŋ naŋ.” Go Jesu kêsôm gêdêŋ eŋ gebe “Ôêc ôna ma ôŋgôm amboac tonaŋgeŋ.”

Jesu kêtu ŋacleŋ Maria agêc Marta

38Ac sêsêlêŋ-sêsêlêŋ sêmoa e jasêô lasê malac teŋ. Ma awê teŋ, ŋaê Marta, kêkôc eŋ sa kêsô ênê andu gêja. 39Ma lasio teŋ gêmoa, nê ŋaê Maria, naŋ gêŋgôŋ Apômtau akaiŋŋa ma gêŋô ênê biŋ. 40Marta gim tau su kêtu sakiŋŋageŋ, tec gêdêŋ Jesu jakêsôm gebe “Apômtau, lasico gêwi sakiŋ siŋ gêdêŋ aê taucgeŋ gajam nec, oc gôlic ŋajam me masi. Ôsôm êndêŋ eŋ gebe ênam aê samaŋ.” 41Tec Apômtau gêjô eŋ awa gebe “Marta, Marta, aôm kôpô sim taôm to gôim taôm su gêŋ taêsamŋa elêmê. 42Aômnêm gêŋ ŋanô tageŋ masi. Maria kêjaliŋ nê gêŋ ŋajam sa sugac, oc sêkôc su aŋga ênê atom.”